E kölsch Verzällche: En Kahnpartie

Et wor ne Sommer, dä keine wor. Der Rähn wollt nit ophüüre. De Lück kujaxte, dat de Puute demnöchs met Schwemmflosse op de Welt köme.
Zo der Zick wor och bei de Schmitzen der Rähn aan der Dachsodenung. No wollt der Ühm, dä bei Schmitzens wonnte, singer Schwijerdochter ens en Freud maache, un hatt versproche, de janze Famillisch zo ner Kahnpartie em Stadtwald enzolade. Doch et Wedder spillten nit met.
Endlich ävver wor et doch ens suwick, un Sonndachs maaten sich de Schmitzens stiefstaats op der Wäch. Der Ühm laht sich düchtig en de Reeme un der Tünnemann, dat Ströppche vun de Schmitze, kriehten vör Verjnöje, zomal dä Kahn öndlich aan Schöckele fing. Der Frau Schmitz dät dat jarnit jefalle un se jov dem Ühm Avis, dat zo loße. Dä stallt sich dauv un schöckelten met dem Jung wigger. „Dun dänne zwei dat Schöckele verbeede“, saht se zo ehrem Mann, „söns steigen ich op der Stell us.“ Ehsch wie se dat Jelächter hoot, wood ehr klor, dat et met dem Ussteige medden op dem Wasser sing Schwierigkeite han wööd.
Derwiel wor der Ühm en singem Iefer zo noh aan der Springbrunne jekumme. Su wood et em Kahn jet feuch un de Frau Schmitz dät öm ehre Sonndachsstaat förchte. Un dat met Räch, ne Wind kom op un em schasewitt flohch der Schmitzen ehre Hot, ieh se in halde kunnt, en der Weiher. Et wor ne Strühhot met breider Kremp un huher Küpp. Su kunnt hä stell vör sich hin schwemme. Der Tünnemann reef: „Mann über Bord“ un der Ühm laht sich op e neus en de Reeme. En singem Iefer schlohch hä met dem eine Ruder dobei op dat jode Stöck. Dat jov dem der Ress. Dat domet keine Staat mih zo maache wor, sohch jeder. „Zoröck un op Heim aan!“, zischte de Frau Schmitz durch de Zäng, un mallich em Kahn woß, wat de Stund jeschlage hatt.
Dat se om Heimwäch en e Jewedder kome und klätschnass woodte, maat de Stimmung nit besser. Su jov et noch e Jewedder, ävver ehsch, wie se widder zo Hus en ehre vier Wäng wore.